მოსწავლეები ქალთა უფლებების დამცველს შეხვდნენ

19 თებერვალს სიქა-ს ორგანიზებით მოეწყო მოსწავლეების შეხვედრა ქალთა უფლებების დამცველთან ლეილა სულეიმანოვასთან. შეხვედრა გაიმართა მარნეულის დემოკრატიული ჩართულობის ცენტრში, რომელშიც მონაწილეობა მიიღეს პროგრამა „მომავლის თაობის“ სამიზნე სკოლების უფროსკლასელმა მოსწავლეებმა გარდაბნის, ბოლნისისა და მარნეულის მუციპალიტეტის აზერბაიჯანული სკოლებიდან.

მოსწავლეებთან აქტიური დისკუსია გაიმართა აზერბაიჯანულ თემში არსებულ ქალთა პრობლემებსა და დისკრიმინაციის შემთხვევებზე, ნაადრევი ქორწინების უარყოფით მხარეებზე.  მოსწავლეებმა ჯგუფებში განიხილეს ქალთა უფლებების დარღვევის კონკრეტული მაგალითები. პრეზენტაციების სახით წარმოადგინეს ქალთა უფლებების დაცვის შესაძლებლობები.

მარნეულის დემოკრატიული ჩართულობის ცენტრში  მოეწყო სამოქალაქო კლუბების აზერბაიჯანელი მოსწავლეების  ნახატების გამოფენა ოჯახური ძალადობის თემატიკაზე. ნამუშევრები  წარმოდგენილი იყო ნახატების კონკურსის ფარგლებში, რომელიც სიქას ინიციატივით მოეწყო სამოქალაქო კლუბების წევრებისათვის. მოსწავლეებმა ნახატებში ასახეს ოჯახური ძალადობის მაგალითები, შექმნეს პოსტერები ნაადრევი - ნაძალადევი ქორწინების თემაზე. კონკურსის ყველა მონაწილეს გადაეცა სერთიფიკატი, 3 საუკეთესო ნამუშევრის ავტორები  კი სიგელებითა და სამახსოვრო საჩუქრებით დაჯილდოვდნენ.

აზერბაიჯანელ ქალთა უფლებების დამცველთან შეხვედრისა და ნახატების კონკურსის მიზანი იყო ოჯახური ძალადობის, ქალთა დისკრიმინაციისა და ნაადრევი ქორწინების შესახებ ქვემო ქართლის აზერბაიჯანულ თემში ცნობიერების ამაღლების ხელშეწყობა. 

შეხვედრას დაესწრო გარდაბნის, ბოლნისისა და მარნეულის მუნიციპალიტეტების სკოლებიდან 35 მოსწავლე და 9 სამოქალაქო განათლების პედაგოგი.