Tuesday, April 18, 2017

"ხელნაკეთი ნივთების კლუბის" ახალი ნაკადი იწყება

სიქა-ში იწყება "ხელნაკეთი ნივთების კლუბის" ახალი ნაკადი განახლებული დროით. 
მობრძანდით ყოველ სამშაბათს, 17:30 სთ-ზე და შესძინეთ ახალი სიცოცხლე დაძველებულ ნივთებს. 
კლუბში მონაწილეობა უფასოა და განკუთვნილია დაწყებითი კლასების მოსწავლეებისთვის.
გელით!
მისამართი: ქ.რუსთავი, მეგობრობის გამზირი, #12-56

მოსწავლეების შეხვედრა სახალხო დამცველის აპარატის წარმომადგენლებთან


სიქას ორგანიზებით 11-12 აპრილს მარნეულის მუნიციპალიტეტის სოფ. ილმაზლოსა და ქესალოს საჯარო სკოლებში გაიმართა აზერბაიჯანელი მოსწავლეებისა და მასწავლებლების შეხვედრა სახალხო დამცველის აპარატის წარმომადგენლებთან. შეხვედრებს ილმაზლოს, ქესალოსა და ქეშალოს სკოლების 50 მოსწავლე და მასწავლებელი დაესწრო. მოწვეული სტუმრები იყვნენ საქართველოს სახალხო დამცველის აპარატის გენდერული თანასწორობის დეპარტამენტის წარმომადგენელი - სოფო რუსეცკი და სახალხო დამცველის ქვემო ქართლის ოფისის წარმომადგენლები - მურად ჰუსეინოვი და მარი გვიდიანი.


Sunday, March 26, 2017

მოსწავლეების შეხვედრა უბნის ინსპექტორებთან ადრეული ქორწინებისა და ოჯახური ძალადობის თემაზე


24 მარტს მარნეულის დემოკრატიული ჩართულობის ცენტრში სიქას ორგანიზებით, პროგრამის "მომავლის თაობა" ფარგლებში საინტერესო შეხვედრა გაიმართა. მოწვეული სტუმრები: ქვემო ქართლის პოლიციის დეპარტამენტის უბნის ინსპექტორი მაია ფელიშვილი და ამავე დეპარტამენტის გარდაბნის რაიონული სამმართველოს უბნის ინსპექტორი ნურლანა ახმედოვა, მარნეულის მუნიციპალიტეტის სოფლების - კირაჩმუღანლოს, ყულარის, ქვემო სარალისა, თაქალოს საჯარო სკოლების მოსწავლეებსა და მასწავლებლებს შეხვდნენ. სტუმრებმა ისაუბრეს ადრეული ქორწინებისა და ოჯახში ძაალადობის საკითხებზე. ქალბატონმა მაიამ ახალგაზრდებს დაწვრილებით განუმარტა ის საკანონმდებლო რეგულაციები, რაც ადრეულ ქორწინებასთან დაკავშირებით არსებობს ქართულ კანონმდებლობაში. დეტალურად ისაუბრა სისხლის სამართლის კოდექსში შესულ ცვლილებასა და 150 პრიმა მუხლზე, რომელიც ქორწინების იძულებას შეეხება. მოსწავლეებს განემარტათ თუ რას ნიშნავს ქორწინების იძულება და როგორ უნდა დაიცვან თავი ამგვარი იძულებისაგან. მასწავლებლებს განემარტათ ის დადგენილება, რომლის თანახმადაც მათ ეკისრებათ შეტყობინების ვალდებულება, თუკი მათთვის ცნობილი გახდება ქორწინების იძულების ფაქტის შესახებ. გარდა ამისა, სტუმრებმა დეტალურად ისაუბრეს იმ პრობლემებზე, რასაც ზოგადად იწვევს ადრეული ქორწინება. 

შეხვედრა წარმატებულ სპორტსმენთან


სიქა-ს ორგანიზებით,16 მარტს პროგრამის "მომავლის თაობა" ფარგლებში მარნეულის დემოკრატიული ჩართულობის ცენტრში გაიმართა შეხვედრა აზერბაიჯანელ ძიუდოისტთან, საქართველოს ჩემპიონთან და საერთაშორისო ტურნირების წარმატებულ მონაწილესთან - სამათ ალიევთან და მარნეულის სპორტული სკოლის წარმომადგენელთან - დავით ნაზღაიძესთან.

შეხვედრას დაესწრნენ პროექტის - "ვიზრუნოთ ჩვენს ჯანმრთელობაზე" ავტორები და სხვა მოსწავლეები ქვემო სარალის, ზემო სარალის, შაუმიანისა და ჯავშანიანის საჯარო სკოლებიდან. სამათმა აზერბაიჯანულ ენაზე ისაუბრა წარმატების მისაღწევად მის მიერ განვლილ გზაზე, სპორტის ადგილზე მის ცხოვრებაში, ჯანსაღი ცხოვრების წესის მნიშვნელობაზე და მის სამომავლო გეგმებზე. 

Monday, March 13, 2017

მონაწილეობა ახალგაზრდულ გაცვლით პროექტში "Say It out loud"

3-12 მარტს რუმინეთის ქალაქ ბუსტენში პროგრამა "Erasmus plus" ფარგლებში მოეწყო ახალგაზრდული გაცვლითი პროექტი "Say It out loud", რომელშიც მონაწილეობდა სიქას მიერ გაგზავნილი ქართული დელეგაცია. ქართველი, რუმინელი, პოლონელი და პორტუგალიელი ახალგაზრდები პროექტის განმავლობაში სწავლობდნენ საჯარო გამოსვლის ტექნიკას და ივითარებდნენ საჯარო გამოსვლის უნარებს. 

Thursday, March 9, 2017

ქართველი მოხალისეები მონაწილეობენ Erasmus+ პროექტში "Silesian institutions service quality relative to foreigners"

სიქამ კიდევ ორ ქართველ ახალგაზრდას მალხაზ ჯიღაურაშვილს და გიორგი თურქაძეს მისცა შესაძლებლობა მონაწილეობა მიიღონ ევროპულ მოხალისეობრივ პროექტში "Silesian institutions service quality relative to foreigners". ქართველი ახალგაზრდები იტალიელ და ესპანელ ახალგაზრდებთან ერთად 12 თვის განმავლობაში მოხალისეობრივად იმუშავებენ პოლონეთის ქალაქ კატოვიცეში, დაეხმარებიან მასპინძელ ორგანიზაციას Bona Fides მიმდინარე პროექტების განხორციელებაში.

Wednesday, March 1, 2017

ფორუმის მონაწილეების ვიზიტი მარნეულის მუნიციპალიტეტის გამგეობაში


28 თებერვალს სიქას ორგანიზებით პროგრამის "მომავლის თაობა" ფარგლებში მარნეულის მუნიციპალიტეტის სოფლების: კაჩაგანის, თაქალოს, არაფლოსა და ყულარის საჯარო სკოლების სამოქალაქო კლუბის წევრები სამოქალაქო განათლების მასწავლებლებთან ერთად მარნეულის მუნიციპალიტეტის გამგეობას ეწვივნენ. მოსწავლეები შეხვდნენ განათლების, კულტურის, სპორტისა და ახალგაზრდულ საქმეთა განყოფილების სპეციალისტებს: მარიამ ტყეშელაშვილს, ირმა ჩხეტიანს, ნინო კირვალიძესა და მარნეულის კულტურის ცენტრის წარმომადგენელს - ირაკლი ნოზაძეს. 
ახალგაზრდებმა გამგეობის წარმომადგელნებს გააცნეს მოსწავლეთა ახალგაზრდული ფორუმის ფარგლებში მათ მიერ დაწერილი პროექტები და კონკრეტული აქტივობების განხორციელებაში გამგეობას მხარდაჭერა სთხოვეს. შეხვედრა საკმაოდ ნაყოფიერი
გამოდგა. გამგეობის წევრებმა მოიწონეს მოსწავლეების გეგმები და მათ საპროექტო იდეების გახორციელებაში აქტიურ მხარდაჭერას დაპირდნენ. კერძოდ, გამგეობა აქტიურად ითანამშრომლებს კაჩაგანის # 1, # 2 და კირაჩმუღანლოს სკოლებთან, რომლებიც გარემოს დაცვით პროექტს ახორციელებენ და ასევე თაქალოს, ყულარის, არაფლოსა და შაუმიანის სკოლებთან, რომლებიც ინტეგრაციის ხელშემწყობ პროექტზე მუშაობენ.
პროგრამას "მომავლის თაობა" ახორციელებს ორგანიზაცია PH International აშშ საერთაშორისო განვითარების სააგენტოს (USAID) დაფინანსებით. პროგრამას მხარს უჭერს საქართველოს განათლებისა და მეცნიერების სამინისტროს მხარდაჭერით. სიქა წარმოადგენს პროგარმის პარტნიორს ქვემო ქართლის რეგიონში.

Tuesday, February 21, 2017

სიქას დელეგაციამ მონაწილეობა მიიღო სემინარში "Youth Voice"

9-16 თებერვალს სიქას ლიდერებმა გიორგი თვალიაშვილმა, ინგა პაიჭაძემ და მარიამი აბულაძემ მონაწილეობა მიიღეს სემინარში "Youth Voice". სემინარი ჩატარდა დიდ ბრიტანეთში, სემინარს ესწრებოდნენ ევროკავშირისა და აღმოსავლეთ ევროპის ახალგაზრდული ორგანიზაციის ლიდერები, სემინარის მიზანი გახლდათ ახალგაზრდული ჩართულობის ხელშემწყობი სტრატეგიის შემუშავება.

Sunday, February 12, 2017

სიქა-ში იქყება ქსოვის კლუბი ახალგაზრდა დიასახლისებითვის

დიასახლისებს უნიკალური შანსი სიქასგან ! 
ყოველ პარასკევს, 12 საათზე ჩვენთან სასიამოვნო და ნაყოფიერი შეხვედრები იწყება. გერმანელი მოხალისეები ქსოვის პრაქტიკულ და გამორჩეულ მასტერკლასებს გთავაზობენ. შემოუერთდი ქსოვის კლუბს სიქას მეგობრულ ოფისში. ქსოვის შესწავლასთან ერთად ქალბატონებს მიეცემათ შესაძლებლობა გაიუმჯობესონ ინგლისურ ენაზე სასაუბრო უნარი. 
გაატარეთ თქვენი თავისუფალი დრო საინტერსოდ, სახალისოდ და სასარგებლოდ. 
კლუბის პირველი შეხვედრა გაიმართება 17 თებერვალს, 12:00 საათზე.
მისამართი: ქ. რუსთავი, მეგობრობის ქ. 12-56; 
დამატებითი ინფორმაციისთვის დაგვიკავშირდით ნომერზე +995 0341 223133

Friday, January 27, 2017

მოსწავლეთა ახალგაზრდული ფორუმის მეორე ნაკადი გაიმართა

 სამოქალაქო განათლების პროგრამის „მომავლის თაობა“ ფარგლებში, სიქა-ს ორგანიზებით, 26 იანვარს ქ.რუსთავში,დემოკრატიული ჩართულობის ცენტრში, გაიმართა ახალგაზრდული ფორუმი, რომელშიც მონაწილეობა მიიღეს დმანისის, ბოლნისის, თეთრიწყაროს, გარდაბნისა და რუსთავის მუნიციპალიტეტების 19 სკოლის მოსწავლეებმა და სამოქალაქო განათლების პედაგოგებმა.
ფორუმზე მოსწავლეეთა ჯგუფებმა იმუშავეს მათ თემში არსებული აქტუალური პრობლემების მოგვარებაზე და ფასილიატორის დახმარებით, შექმნეს პროექტები. თითოეულ პროექტს პროგრამა დააფინანსებს მცირე გრანტით, რაც მოსწავლეებს დაეხმარებათ პროექტის რეალურად განხორციელებასა და დასახული მიზნის მიღწევაში. იხ. ფოტოალბომი

Wednesday, January 25, 2017

მარნეულის, გარდაბნისა და ბოლნისის საჯარო სკოლების მონაწილეობით მოსწავლეთა ახალგაზრდული ფორუმი გაიმართა

24 იანვარს სიქა-ს ორგანიზებით, სამოქალაქო განათლების პროგრამის "მომავლის თაობა" ფარგლებში, მოეწყო მოსწავლეთა ახალგაზრდული ფორუმის პირველი ნაკადი. ფორუმი გაიმართა რუსთავის დემოკრატიული ჩართულობის ცენტრში და მასში მონაწილეობა მიიღეს პროგრამის სამიზნე 19 სკოლის მოსწავლეებმა და სამოქალაქო განათლების პედაგოგებმა მარნეულის, გარდაბნისა და ბოლნისის მუნიციპალიტეტებიდან. 
ახალგაზრდული ფორუმის ფარგლებში მოსწავლეთა ჯგუფებმა იმუშავეს თემში არსებული აქტუალური პრობლემების მოგვარებაზე და ფასილიტატორის დახმარებით შექმნეს პროექტები. თითოეული პროექტს პროგრამა დააფინანსებს მცირე გრანტით, რაც მოსწავლეებს დაეხმარებათ პროექტის რეალურად განხორციელებასა და დასახული მიზნის მიღწევაში.
მოსწავლეთა პრეზენტაციას დაესწრო ქვემო ქართლში სახელმწიფო რწმუნებულ-გუბერნატორი ბ-ნ პაატა ხიზანაშვილი. მან მოიწონა მოსწავლეთა ნამუშევრები, გააცნო ამ პრობლემების გადაჭრის კუთხით სამხარეო ადმინისტრაციის მუშაობა და მხარდაჭერას დაჰპირდა პროექტების განხორციელებაში.
სამოქალაქო განათლების პროგრამას „მომავლის თაობა“ ახორციელებს ამერიკული ორგანიზაცია PH International  აშშ საერთაშორისო განვითარების სააგენტოს დაფინანსებით და საქართველოს განათლებისა და მეცნიერების სამინისტროს მხარდაჭერით. სიქა- საგანმანათლებლო ინიციატივების ქართული ასოციაცია წარმოადგენს პროგრამის პარტნიორს ქვემო ქართლის რეგიონში.
ფორუმი გააშუქა ქვემო ქართლის ტელე-რადიო კომპანიამ, იხ. სიუჟეტი ფოტოალბომი