Monday, March 31, 2014

სამოქალაქო ინტეგრაციის ახალგაზრდულ ბანაკში შემუშავებული პროექტის განხორციელებით წალკაში გზებზე გადაადგილება უსაფრთხო გახდა

სამოქალაქო ინტეგრაციის ახალგაზრდულ ბანაკში წალკის #1 საჯარო სკოლის მოსწავლეებმა და კლუბის მეურვემ, მუნიციპალიტეტისათვის აქტუალური პრობლემებიდან გზებზე უსაფრთხო მოძრაობაზე გაამახვილეს ყურადღება. დასახელდა  განსაკუთრებით კრიტიკული უბანი  ჭელიძის ქუჩა, რომელზეც სკოლა და საბავშვო ბაღია განთავსებული. ბანაკის მონაწილეებმა გადაწყვიტეს სკოლისა და ბაღის მიმდებარე ტერიტორიაზე მოძრაობის შემაფერხებელი ბარიერების მოწყობით ხელი შეეწყოთ სკოლის მოსწავლეებისა და ბაღის აღსაზრდელების უსაფრთხო გადაადგილებისათვის. ბანაკის დასრულების შემდეგ, წალკაში დაბრუნებისას კლუბის წევრები, მუნიციპალიტეტის სომხური სკოლების წარმომადგენლებთან ერთად შეხვდნენ წალკის ადგილობრივ თვითმმართველობას,  ქალაქის საკრებულოს. მათთან თანამშრომლობით შედგენილი იქნა პროექტი და  ნახაზი თუ სად უნდა განთავსებულიყო საგზაო ნიშნები და „მწოლიარე პოლიციელი“.  თვითმართველობის თანადაფინასებით და სამოქალაქო კლუბების წევრების დახმარებით  მოხდა მოძრაობის შემაფერხებელი ბარიერების მონტაჟი ქ. წალკაში,
ჭელიძის ქუჩაზე, დაიდგა ოთხი გამაფრთხილებელი საგზაო ნიშანი.  აღნიშნულმა პროექტმა დიდი მოწონება და დადებითი განწყობა გამოიწვია ქალაქის მცხოვრებთა შორის.

პროექტის განხორციელების შედეგად სარგებელი მიიღო 800-მდე ადამიანმა, წალკის #1 სკოლისა და საბავშვო ბაღის აღსაზრდელებმა, მშობლებმა და პედაგოგ-აღმზრდელებმა.

Sunday, March 30, 2014

სამოქალაქო ინტეგრაციის ბანაკში შემუშავებული პროექტის განხორციელების შედეგად ქ.ბოლნისში ცენტრალურ გზაზე ბარიერები დამონტაჟდა

2014 წლის 15-19 იანვარს სიქა-ს ორგანიზებით სამოქალაქო განათლებისა და პედაგოგთა გადამზადების პროგრამის ფარგლებში ორგანიზებულ სამოქალაქო ინტეგრაციის ბანაკში ბოლნისის მუნიციპალიტეტის ქართული და აზერბაიჯანული სკოლების სამოქალაქო კლუბების წევრებიც იღებდნენ მონაწილეობას. 
ბანაკში მოსწავლეებმა შეიმუშავეს პროექტი, რომლითაც შეეცადნენ ბოლნისისათვის მეტად აქტუალური - გზებზე უსაფრთხო გადაადგილების პრობლემის მოგვარებას.
დასაწყისში მოსწავლეები გეგმავდნენ სკოლის წინ ცენტრალურ გზაზე ბარიერების მოწყობას, მაგრამ ადგილობრივ თვითმმართველობასთან შეხვედრის შემდეგ გაირკვა, რომ თვითმმართველობა თავად გეგმავდა გზის ამ მონაკვეთზე მოძრაობის შემაფერხებელი ბარიერის დამონტაჟებას.
მოსწავლეებმა ბოლნისში სამი კრიტიკული ადგილი შეარჩიეს, სადაც მაღალია საგზაო შემთხვევების რიცხვი: ფიროსმანის ქუჩა, სადაც სკვერში ადგილობრივი მოსახლეობა ისვენებს მცირეწლოვან ბავშვებთან ერთად, მიუხედავად მოსახლეობის მიერ თვითმმართველობისადმი არაერთი მიმართვისა, პრობლემა კვლავ მოუგვარებელი რჩებოდა; აღმაშენებლის ქუჩაზე, გზაჯვარედინთან, სადაც განსაკუთრებით მაღალი იყო ავტოსაგზაო შემთხვევები მოძრაობის შემზღუდავი ნიშნების სიმცირის გამო და პეტრიაშვილის ქუჩაზე, #6 საბავშო ბაღთან, სადაც 70-დე აღსაზრდელი სწავლობს.
პროექტის განხორციელებით ბოლნისის ადგილობრივი მაცხოვრებლები დიდ კმაყოფილებას გამოთქვამენ. იმედია მოსწავლეების ინიციატივით დამონტაჟებული ბარიერები მნიშვნელოვნად შეუწყობს ხელს ბოლნისში უსაფრთხო გადაადგილებას.

Saturday, March 29, 2014

საბუნებისმეტყველო საგნებში წარმატებული მოსწავლეების შეხვედრა აშშ ელჩის მოვალეობის შემსრულებელთან

ფოტო აღებულია  US Embassy Tbilisi, Georgia ფეისბუკის გვერდიდან
ქალთა ისტორიის თვის ფარგლებში აშშ ელჩის მოვალეობის შემსრულებელმა ბრიჯიტ ბრინკმა 27 მარტს შეხვედრას უმასპინძლა. შეხვედრას მეცნიერების, ტექნოლოგიის, ინჟინერიისა და მათემატიკის ე.წ. STEM სფეროებში წარჩინებული ქალები და მოსწავლე გოგონები ესწრებოდნენ. წელს საელჩოს ფოკუსი STEM სფეროში წარმატებული ქალების წარმოჩენაა. 
სიქა-ს ორგანიზებით შეხვედრაში მონაწილეობა მიიღო რუსთავის, მარნეულისა და თეთრიწყაროს საჯარო სკოლების საბუნებისმეტყველო საგნებში წარმატებულმა 5 მოსწავლემ, რომლებიც სამოქალაქო კლუბების აქტიური წევრებიც არიან. გოგონებს საშუალება ჰქონდათ STEM სფეროებში წარჩინებული ქალებისგან პირადად მიეღოთ კარიერული და ცხოვრებისეული რჩევები. იხ. ფოტოები.

ტრენინგი სიქა-ს ახალგაზრდა ლიდერებისთვის


2014 წლის 28 მარტს სიქა-საგანმანათლებლო ინიციატივების ქართული ასოციაციის ახალგაზრდულ ლიდერებს, ჩაუტარდათ ტრენინგი პირველადი გადაუდებელი სამედიცინო დახმარების აღმოჩენის კურსებზე. შეხვედრას ესწრებოდა 15 ლიდერი, ტრენინგი სიქა-ს ინიციატივით, „ბი-დი-სი აკადემიის“ ტრენერებმა ჩაატარეს. 
პროგრამა ითვალისწინებდა გადაუდებელ შემთხვევებს, კერძოდ:
1. უგონო მდგომარეობები, ამოცნობა.
2. ცენტრალური პულსის და სუნთქვის შემოწმება.
3. სასუნთქი გზების გახსნის ტექნიკა და გულის არაპირდაპირი მასაჟი.
4. ასევე გარეგანი ავტომატური დეფიბრილიატორის მუშაობის პრინციპის ახსნა.
შეხვედრა შედგა „ბი-დი-სი აკადემიის“ ოფისში ქ. თბილისში, რომელიც გაგრძელდა ერთი საათი.

სამოქალაქო კლუბების ვიზიტი 112-ის საინფორმაციო სამსახურის ოფისში

ფოტო მოგვაწოდა შსს სსიპ - „112"- ის საზოგადოებასთან ურთიერთობის სამსახურმა
27 მარტს, სიქა-ს ორგანიზებით ქვემო ქართლის სამოქალაქო კლუბების 35 წევრი ესტუმრა 112-ის საინფორმაციო სამსახურს, სადაც ვიზიტორები გაეცნენ სამსახურის მუშაობის სპეციფიკას. სამსახურის თანამშრომელმა ძალიან საინტერესო გიდობა გაუწია ჯგუფს. გარდა სამსახურის მუშაობის გაცნობისა, მონაწილეებს ესაუბრა თუ როგორ უნდა მოიქცნენ სხვადასხვა უბედური შემთხვევისას.  მაგ: როგორ მოიქცნენ როცა შენიშნავენ ნარკოტიკებით ინტოქსიკაციის შემთხვევას, ჩაეკეტებათ კარები და ა.შ
ვიზიტორებმა ასევე ინფორმაცია მიირეს შსს ანტინარკოტიკული კამპანიის "ერთად შევცვალოთ დამოკიდებულება"  შესახებ, რომლის მიზანია ე.წ. ბიონარკოტიკის პრევენცია და მოსახლეობის ინფორმირება.
მონაწილეებმა ძალიან დადებითად შეაფასეს ვიზიტი და აღნიშნეს, რომ არ ელოდნენ 112-ის მუშაობის ამ დონის პროფესიონალიზმს. მოსწავლეებმა ასევე აღნიშნეს, რომ თავს გრძნობენ მეტად დაცულად, რისთვისაც სიქა-ს გუნდს დიდი მადლობა გადაუხადეს მსგავსი ვიზიტების ორგანიზებისთვის.
ვიზიტორი სკოლები იყვნენ: მარნეულის #3, #5, #6 , კოდის საჯარო და რუსთავის #4, #11, #12, #17 სკოლების სამოქალაქო კლუბების წევრები. იხ.ფოტოები

Wednesday, March 19, 2014

ტრენინგი გენდერულ თანასწორობაზე


სიქა-ს ევროპელ მოხალისეებმა 14 მარტს სამოქალაქო განათლებისა და პედაგოგთა გადამზადების პროგრამის ფარგლებში ჩაატარეს ტრენინგი თემაზე „გენდერული თანასწორობა“. ტრენინგი ჩატარდა გარდაბნის #1 საჯარო სკოლაში, რომელსაც დაესწრო სამოქალაქო კლუბ "Creative Teenagers" 24 წევრი.
ტრენინგის მიზანი იყო ახალგაზრდებს უფრო მეტი ინფორმაცია მიეღოთ გენდერული თანასწორობის შესახებ. ტრენინგი მიმდინარეობდა ინტერაქტიულად, კითხვა-პასუხის რეჟიმში. მონაწილეები გაეცნენ უცხოელი მოხალისეების მიერ მომზადებულ პრეზენტაციას, სადაც მოყვანილი იყო საქართველოში გენდერული თანასწორობა-უთანასწორობის მაგალითები. ტრენინგი მიმდინარეობდა თარგმანით ინგლისურიდან ქართულ ენაზე. ღონისძიების დასასრულს კლუბის წევრებმა კმაყოფილება გამოთქვეს ტრენინგის გამო და აღნიშნეს, რომ მსგავსი ტრენინგები ხელს უწყობს ახალგაზრდების ცნობიერების ამაღლებას გენდერული თანასწორობის საკითხში. 

ტრენინგი ვიდეოს დამუშავების შესახებ

15 მარტს სიქა-ს ოფისში მოეწყო სოც.მედიის ტრენინგი თემაზე "როგორ დავამუშაოთ ვიდეო", რომელსაც დაესწრნენ კაზრეთის #1 საჯარო სკოლის სამოქალაქო კლუბის "საფიხვნოს" წევრები და კლუბის მეურვე.ტრენინგს უძღვებოდა სიქას ტრენერი, სოც- მედიის მიმართულების კოორდინატორი ეთერი პაიჭაძე. ტრენინგის მონაწილეები გაეცვნენ პროგრამა Windows Live Movie Maker -ის ინსტრუმენტებს, მიიღეს საჭირო რჩევები, რაც უნდა გაითვალისწინონს ვიდეოს დამონტაჟების დროს. პრაქტიკულად განახორციელეს პორტალ Youtube.com-ზე ვიდეოს განთავსება. მიღებული ცოდნის გამოყენებით კლუბის წევრები აპირებენ საკლუბო ღონისძიებების გაშუქებას და ფართო საზოგადოებისათვის გაზიარებას.

Tuesday, March 11, 2014

სიქა-ს ახალგაზრდული კლუბის კურსდამთავრებული ლიტვაში მოხალისებრივ საქმიანობას შეუდგა

სიქა-ს ახალგაზრდული კლუბის "უნარები პროფესიული წარმატებისათვის" ერთ-ერთმა კურსდამთავრებულმა, ანა ჩიკვილაძემ ლიტვაში ქ. ვიევისში ევს (EVS - European Volunteer Service) პროგრამის ფარგლებში აქტიური მოხალისეობრივი საქმიანობა დაიწყო. 10 თვის განმავლობაში ანა ვიევისის კულტურულ ცენტრში იმუშავებს ადგილობრივ ახალგაზრდებთან, გაიღრმავებს კულტურული გამომსახველობის კომპეტენციებს, აიმაღლებს გერმანული, ინგლისური და რუსული ენების ცოდნას, შეისწავლის ლიტვურ ენას. წარმატებებს ვუსურვებთ ანას! 

Monday, March 10, 2014

რუსთავის სასკოლო სამოქალაქო კლუბების წევრებმა მძღოლებსა და ფეხითმოსიარულეებს საგზაო წესების დაცვისკენ მოუწოდეს

სიქა-ს ორგანიზებით რუსთავის სამოქალაქო კლუბის წევრებმა რუსთავის ქუჩებში აქტივობა გამართეს, რომლის ფარგლებშიც მოსწავლეებმა მძღოლებსა და ფეხითმოსიარულეებს საგზაო წესების დაცვისკენ მოუწოდეს. 
სამოქალაქო კლუბის წევრებმა პოსტერებითა და პლაკატებით სიმბოლურად გადაკვეთეს „ზებრა“ გადასასვლელი და მძღოლებს მოუწოდეს, რომ შეანელონ სვლა და გადასასვლელზე გზა დაუთმონ ფეხით მოსიარულეებს.
მონაწილეებმა თემში დაარიგეს ფლაერები, რითაც მოსახლეობას კიდევ ერთხელ შეახსენეს, რომ გზის გადაკვეთის დროს „ზებრა“ გადასასვლელით უნდა ისარგებლონ.
აღნიშნული აქტივობა ლეონიძისა და მესხიშვილი ქუჩების გადაკვეთაზე მოეწყო, სადაც სამოქალაქო კლუბებმა განახორციელეს პროექტი, რომლის ფარგლებშიც აღნიშნულ ტერიტორიაზე დაიდგა 9 საგზაო ნიშანი, გაკეთდა წრიული და დაიხაზა ფეხითგადასასვლელი ე.წ. „ზებრა“.
პროექტი რუსთავის მერიისა და საგზაო საპატრულო პოლიციის თანადგომით განხორციელდა.
აღნიშნულ აქტივობას რუსთავის სკოლების სამოქალაქო კლუბების 30-მდე მოსწავლე შეუერთდა.

სიქა-ში ფუნქციონირებას იწყებს ახალი ინგლისურენოვანი კლუბი „კომიქსების კლუბი“"


13 მარტს სიქა-საგანმანათლებლო ინიციატივების ქართულ ასოციაციაში კიდევ ერთი ინგლისურენოვანი კლუბი „კომიქსების კლუბი“ დაიწყებს ფუნქციონირებას. 
კლუბის მიზანია: ინგლისური ენის პრაქტიკაში გამოყენება, სმენისა და ლაპარაკის უნარების განვითარება, ინგლისურ ენოვანი კომიქსების პოპულარიზაცია.
ახალგაზრდები შეისწავლიან კომიკოსებს სხვადასხვა პოპულარული კომპანიებისგან. როგორიცაა „მარველი“ (Marvel) “DC” “Image” “Dark Horse” “Independent Publication”.
მონაწილეები გამართავენ დისკუსიას ინგლისურად ამა-თუ იმ კომიქსზე. ასევე მათ ექნებათ საშუალება თვითონვე შექმნან კომიქსები მათივე იდეებითა და სცენარით
კლუბში სამუშაო ენა იქნება ინგლისური. გიწვევთ ყველა დაინტერესებულ პირს ასაკით 12 წლიდან. კლუბში დასწრება თავისუფალია.
„კომიქსების კლუბი“ გაიმართება ყოველ ხუთშაბათს 17:00 საათზე სიქა-ს ძველ ოფისში. მისამართი მეგობრობის გამზირი 12/56 რუსთავი. ტელეფონი: 341 223 133

სიქა ჩაერთო პროექტში Adobe Youth Voices

სიქა ჩაერთო iEARN-ის საერთაშორისო პროექტში Adobe Youth Voices, რომლის ფარგლებში ახალგაზრდები გაეცნობიან მედიაწიგნიერებას და შექმნიან საკუთარ მედიანამუშევრებს, რომელსაც შემდგომ გაუზიარებენ უცხოელ თანატოლებს. პროექტის ფარგლებში ახალგაზრდები შეისწავლიან პროგრამებში Adobe Photoshop Elements და Adobe Premiere Elements მუშაობას, ჩაუტარდებათ ვორკშოპები. 7 მარტს მოეწყო სამიზნე ჯგუფთან პირველი შეხვედრა, რომელზეც ტრენერმა ეთერ პაიჭაძემ მოსწავლეებს გააცნო პროგრამა, განიხილეს უცხოელი თანატოლების მიერ შექმნილი მედიანამუშევრები Adobe Youth Voices-ის ფარგლებში. 
შეხვედრები გაიმართება კვირაში 2-ჯერ, რომელზეც პროექტში ჩართული ახალგაზრდები მიიღებენ ახალ დავალებებს

რუსთავის სასკოლო სამოქალაქო კლუბების სამუშაო შეხვედრა სიქა-ს ოფისში


4 მარტს რუსთავის სასკოლო სამოქალაქო კლუბების წევრები სიქას ოფისში შეიკრიბნენ და ერთმანეთს თებერვლის თვეში განხორციელებული აქტივობები გაუზიარეს.
კლუბები ჩაერთვნენ სიქას მიერ გამოცხადებულ აქტივობაში „გავაკეთოთ ეს ქვემო ქართლში“, რომლის ფარგლებში კლუბებში მოიწვიეს სხვადასხვა პროფესიის ადამიანები, რომლებთანაც მოაწყვეს შეხვედრა და დისკუსია მათთვის საინტერესო და სასარგებლო თემებზე.
აქტივობაში მონაწილეობისთვის კლუბებს საჩუქრად გადაეცათ საკანცელარიო კომპლექტი, რომელსაც კლუბში მუშაობის დროს გამოიყენებენ.
შეხვედრაზე კლუბის წევრებმა ისაუბრეს ინიციატივებსა და შედეგებზე, რომლითაც სხვადასხვა დაწესებულებებს მიმართეს.
მაგალითისთვის, რუსთავის 23-ე სკოლის სამოქალაქო კლუბს რესტორანმა „თამადამ“ 50 ლარის ღირებულების ტკბილეული და იები გადასცა, რომლითაც კლუბმა 3 მარტს მოხუცთა სახლის ბინადარნი გაახარეს.
რუსთავის #20 სკოლის ინიციტივაზე კი ი.მ. „ზურაბ გიორგაძემ“ თანხმობა განაცხადა და მოსწავლეებს სკოლის ღობის შესაღებად 15 კოლოგრამი საღებავი და 5 ცალი ფუნჯი უფასოდ გადასცა.
მოსწავლეებმა ერთობლივად დაგეგმეს სამომავლო აქტივობა, რომელიც საგზაო წესების დაცვის პროპაგანდას ემსახურება და მომდევნო სამუშაო შეხვედრაზეც შეთანხმდნენ.

Tuesday, March 4, 2014

ონლაინ კონფერენცია საქართველოს განათლებისა და მეცნიერების მინისტრის მოადგილესთან ლია გიგაურთან

27 თებერვალს თბილისში აირექსის განათლების მულტიმედიურ ცენტრში მოეწყო ონლაინ კონფერენცია, რომლის სტუმარი იყო საქართველოს განათლებისა და მეცნიერების მინისტრის მოადგილე ლია გიგაური. კონფერენციას რეგიონების სასკოლო სამოქალაქო კლუბების წევრები პროგრამის პარტნიორი ადგილობრივი ორგანიზაციების ოფისიდან ადევნებდნენ  თვალს. სკაიპის მეშვეობით ხდებოდა კითხვების მიწოდება.
სიქას ოფისიდან ონლაინ კონფერენციაში ჩაერთვნენ რუსთავის #2, #4, #17 და #23 საჯარო სკოლების სამოქალაქო კლუბების წევრები. კონფერენციის დასაწყისში ქ-ნმა ლიამ ისაუბრა მოსწავლეთა მონაწილეობის შესახებ დემოკრატიული სახელმწიფოს ჩამოყალიბების პროცესში, მოსწავლეებს გაუზიარა საკუთარი ხედვა, თუ როგორ შეუძლიათ მათ მონაწილეობის მიღება სკოლაში თუ სკოლის გარეთ არსებული პრობლემების მოგვარებაში. შემდეგ კონფერენცია გაგრძელდა კითხვა-პასუხის რეჟმში. ახალგაზრდებმა მიიღეს ამომწურავი პასუხები მათთვის საინტერესო კითხვებზე, როგორიცაა მე-12 კლასის საკითხი, გამოცდები სკოლებში, სამოქალაქო კლუბების მომავალი და სხვა. მოსწავლეებმა კმაყოფილება გამოთქვეს ონლაინ კონფერენციის შესახებ და მსგავს შეხვედრებში მონაწილეობის სურვილი გამოთქვეს.
კონფერენცია მოეწყო PH International-ის ორგანიზებით სამოქალაქო განათლებისა და პედაგოგთა გადამზადების ფარგლებში.