Tuesday, December 26, 2017

სიქაში დასრულდა "მომავალ ლიდერთა კლუბის" პირველი სეზონი

24 დეკემბერს სიქაში გაიმართა მომავალ ლიდერთა კლუბის დახურვა. 3 თვის განმავლობაში კლუბის წევრებმა გაიარეს "მომავალი ლიდერების ტრენინგ-კურსი", რომელიც მოიცავდა ლიდერობის, გუნდურობის, ეფექტური კომუნიკაციის, პრეზენტაციისა და შემოქმედებითი აზროვნების საბაზო უნარებს.
კლუბის წევრებისთვის ახალი სეზონი გაიხსნება 2018 წლის იანვრიდან. ასევე იანვარში სიქა გამოცხადებს მომავალი ლიდერების კლუბში ახალი წევრების მიღებას.

Thursday, December 21, 2017

სიქამ პროექტის "მეტი შეგიძლია" ფარგლებში კონფერენცია გამართა

15 დეკემბერს სიქას გუნდმა თბილისში, სასტუმრო ასტორიაში პროექტის "მეტი შეგიძლია" ფარგლებში კონფერენცია გამართა. კონფერეციას ესწრებოდნენ პროექტის პარტნიორები გერმანიიდან, საქართველოში გერმანიის საელჩოს წარმომადგენლები, პროექტის კოორდინატორები და პედაგოგები საქართველოს 10 რეგიონიდან. საქართველოში პროექტის ხელმძღვანელმა ინგა პაიჭაძემ და პროექტის ფარგლებში ორგანიზებული ახალგაზრდული არჩევნების მონაწილე პედაგოგებმა და მოსწავლეებმა სააზოგადოებას გაუზიარეს U18 ახალგაზრდული არჩევნების გამოცდილება, მისი გავლენა ახალგაზრდების სამოქალაქო და საარჩევნო ცნობიერებაზე. კონფერენციაზე წარმოდგენილი იყო პროექტის ფარგლებში შექმნილი დამხმარე სახელმძღვანელო, რომელიც ახალგაზრდების სამოქალაქო ჩართულობის გაძლიერებას ეძღვნება.

Tuesday, December 12, 2017

სიქამ მონაწილეობა მიიღო არასამთავრობო ორგანიზაციების გამოფენაში

2 დეკემბერს სიქას ახალგაზრდა ლიდერებმა მონაწილეობა მიიღეს არასამთავრობო, ახალგაზრდული ორგანიზაციების გამოფენაში, რომელიც გაიმართა საერთაშორისო ახალგაზრდული ფორუმი ფარგლებში. 
საერთაშორისო ახალგაზრდული ფორუმი განახორციელა მშვიდობისა და განვითარების აკადემიამ, MeOut ასოციაციასთან (უნგრეთი) თანამშრომლობით. ფორუმში მონაწილეობას მიიღეს ახალგაზრდულმა ორგანიზაციებმა ვიშეგრადის ოთხეულისა და აღმოსავლეთ პარტნიორობის ქვეყნებიდან.

Friday, December 1, 2017

სიქა-მ მონაწილეობა მიიღო გამოფენა-კონფერენციაში "სკოლა და არაფორმალური განათლება"

1 დეკემბერს სიქა-მ მონაწილეობა მიიღო კოალიცია "განათლება ყველასათვის - საქართველოს" მიერ ორგანიზებულ გამოფენა-კონფერენციაში "სკოლა და არაფორმალური განათლება".
გამოფენა-კონფერენციის მიზანი იყო ზოგადი განათლების სფეროში არაფორმალური განათლების შესახებ გამოცდილების გაზიარება და სკოლებთან მომუშავე არაფორმალური განათლების მიმწოდებელთა პრაქტიკის გაცნობა.


Monday, November 20, 2017

სიქაში "მომავალ ლიდერთა კლუბის" მორიგი შეხვედრა გაიმართა

19 ნოემბერს სიქაში შედგა 9-12 წლის ასაკის "მომავალ ლიდერთა კლუბის" მორიგი შეხვედრა. თემა იყო "სტერეოტიპები". ტრენინგი დატვირთული იყო სახალისო ენერჯაიზერებითა და სავარჯიშოებით.

Wednesday, November 15, 2017

სამუშაო შეხვედრა კიევში პროგრამის "მეტი შეგიძლია - ბავშვებისა და ახალგაზრდების სამოქალაქო გაძლიერებისათვის აღმოსავლეთ ევროპაში" ფარგლებში

სიქა-ს წარმომადგენლები ინგა პაიჭაძე და ცირა თავშავაძე 12 ნოემბერს მიწვეულნი იყვნენ კიევში გამართულ ახალგაზრდულ ფორუმზე. საერთაშორისო პროგრამის "მეტი შეგიძლია - ბავშვებისა და ახალგაზრდების სამოქალაქო გაძლიერებისათვის აღმოსავლეთ ევროპაში" ფარგლებში, 13 და 14 ნოემბერს ქართველმა ექსპერტებმა მონაწილეობა მიიღეს სამუშაო შეხვედრაში, სადაც უკრაინელ კოლეგებს, პედაგოგებსა და ახალგაზრდულ მუშაკებს გაუზიარეს საქართველოს გამოცდილება სამოქალაქო და პოლიტიკური განათლების სფეროში, ისაუბრეს საქართველოში ორგანიზებული იმიტირებული ახალგაზრდული არჩევნების გამოწვევებისა და შედეგების შესახებ. პროექტი ხორციელდება გერმანულ ორგანიზაცია DRA-სთან თანამშრომლობით, პროექტის დამფინანსებლები: გერმანიის საგარეო საქმეთა ფედერალური სამინისტრო; ბერლინის განათლების, ახალგაზრდობისა და მეცნიერების დეპარტამენტის სენატი და ქ. ბერლინის საქველმოქმედო ასოციაცია პარიტეტი.

Monday, October 30, 2017

იმიტირებული ახალგაზრდული არჩევნები U18 ფორმატით

9-20 ოქტომბერს, სიქას ორგანიზებით საქართველოს 10 რეგიონის 72 სკოლაში ჩატარდა იმიტირებული ახალგაზრდული არჩევნები U18 ფორმატით. სამოქალაქო განათლების მასწავლებლების დახმარებით მოსწავლეებმა განიხილეს საარჩევნო სუბიექტების პროგრამები, მოაწყვეს დებატები და დისკუსიები პროგრამების ძირითად მიმართულებებზე, პროგრამების ძლიერ და სუსტ მხარეებზე. პროგრამების საფუძველზე მოხდა ანონიმური საარჩევნო სუბიექტებისათვის ხმის მიცემა, ახალგაზრდულ არჩევნებში მონაწილეობა მიიღო დაახლოებით 7ათასმა 18 წლამდე ახალგაზრდამ. აქტივობები განხორციელდა საერთაშორისო პროექტის „მეტი შეგვიძლია! - ბავშვებისა და ახალგაზრდების სამოქალაქო მონაწილეობის გაძლიერების ხელშეწყობა აღმოსავლეთ ევროპაში“, რომელსაც გერმანულ ორგანიზაციასთან DRA ერთად საქართველოში სიქა ახორციელებს.

Thursday, October 26, 2017

სიქას დელეგაციამ მონაწილეობა მიიღო საერთაშორისო ახალგაზრდულ გაცვლით პროექტში "ევროვიზია"

17-24 ოქტომბერს სიქას დელეგაციამ მონაწილეობა მიიღო საერთაშორისო ახალგაზრდულ გაცვლით პროექტში "ევროვიზია". პროექტი განხორციელდა იტალიაში, პროგრამა Erasmus Plus ფარგლებში. პროექტის მიზანი იყო ახალგაზრდების კომპეტენციების გაზრდის ხელშეწყობა მუსიკისა და საინფორმაციო ტექნოლოგიების სფეროში. ქართული დელეგაციის შემადგენლობაში იყვნენ ახალგაზრდები რუსთავიდან, თბილისიდან, ყვარლიდან და ოზურგეთიდან. პროექტში მონაწილეობდა 30 ახალგაზრდა ევროპის 5 ქვეყნიდან.

Wednesday, October 25, 2017

ACCESS პროგრამა დაიწყო

25 ოქტომბერს სიქაში დაიწყო "ინგლისური ენის შესწავლის ხელმისაწვდომობის სასტიპენდიო პროგრამა" (English Access Microscholarship Program), რომელსაც ახორციელებს ამერიკული ორგანიზაცია PH International აშშ სახელმწიფო დეპარტამენტის დაფინანსებით. 2 წლის მანძილზე 14-17 წლის ახალგაზრდები სოციალურად დაუცველი და შეჭირვებული ოჯახებიდან შეისწავლიან ინგლისურ ენას, ეზიარებიან ამერიკულ კულტურას, წეს-ჩვეულებებს და განივითარებენ ლიდერის თვისებებს. პროგრამაში ჩართულია 25 რუსთაველი ახალგაზრდა, რომლებიც წინასწარი ტესტირების საფუძველზე გადანაწილებულია 2 ჯგუფში. პროგრამა ხორციელდება საქართველოს 16 ქალაქში, მათ შორის რუსთავში. სიქა კოორდინირებას უწევს რუსთავის ჯგუფების მუშაობას. 

Sunday, October 22, 2017

ლიდერთა კლუბის მორიგი შეხვედრა ტოლერანტობის თემაზე

22 ოქტომბერს სიქას ოფისში შედგა 9-12 წლის ასაკის ლიდერების კლუბის მორიგი შეხვედრა, რომლის თემა იყო ტოლერანტობა. მოზარდებმა სხვადასხვა სახალისო სავარჯიშოებით განიხილეს და გაიაზრეს რა არის გაზიარება და მიმღებლობა.
კლუბში მონაწილეთა მიღება გრძელდება.
შეხვედრები იმართება ყოველ კვირას, 13:30 საათზე.

რუსთავში იწყება "ინგლისური ენის შესწავლის ხელმისაწვდომობის სასტიპენდიო პროგრამა"

20 ოქტომბერს სიქაში ჩატარდა წინასწარი ტესტირება "ინგლისური ენის შესწავლის ხელმისაწვდომობის სასტიპენდიო პროგრამის" (English Access Microscholarship Program) ფარგლებში და შეირჩა 25 მოსწავლე (ქ.რუსთავის სკოლებიდან) , რომლებიც 2 წლის განმავლობაში შეისწავლიან ინგლისურ ენას, ეზიარებიან ამერიკულ კულტურასა და წეს-ჩვეულებებს და განავითარებენ ლიდერის თვისებებს.
ამერიკული ორგანიზაცია PH International და სიქა -საგანმანათლებლო ინიციატივების ქართული ასოციაცია, აშშ სახელმწიფო დეპარტამენტის დაფინანსებით იწყებს ქ.რუსთავში "ინგლისური ენის შესწავლის ხელმისაწვდომობის სასტიპენდიო პროგრამას". პროგრამა მიზნად ისახავს ხელმისაწვდომი გახადოს ინგლისური ენის შესწავლა 14-17 წლის მოზარდებისთვის სოციალურად დაუცველი და ეკონომიურად შეჭირვებული ოჯახებიდან. პროგრამა ხორციელდება საქართველოს 16 ქალაქში, მათ შორის ქ.რუსთავში. 

Wednesday, October 18, 2017

ქართველი მოხალისე ლატვიაში

მარიამ ტლაშაძე - აქტიური ახალგაზრდაა გორიდან, რომელსაც სიქა-მ მისცა შესაძლებლობა EVS (ევროპული მოხალისეობრივი პროგრამა)-ით მონაწილეობა მიიღოს პროექტში "Promotion of Permaculture in Smiltere District”. მარიამი 10 თვის განმავლობაში, ლატვიაში, მასპინძელ ორგანიზაციასთან ერთად აქტიურად იმუშავებს მოქალაქეების გარემოსდაცვითი ცნობიერების ამაღლების მიმართულებით.

Sunday, October 15, 2017

ლიდერთა კლუბის მორიგი შეხვედრა გაიმართა

15 ოქტომბერს სიქაში შედგა 9-12 წლის ასაკის მომავალი ლიდერების კლუბის მორიგი შეხვედრა. თემა იყო „ეფექტური კომუნიკაცია“. ტრენინგი დატვირთული იყო სახალისო ენერჯაიზერებით და სავარჯიშოებით. კლუბში მსურველთა მიღება გრძელდება, იხ. აპლიკაცია

სტაჟირება სიქაში

18-25 წლის ახალგაზრდებისათვის სტაჟირების შესაძლებლობა სიქაში.
მოქნილი გრაფიკი, მრავალფეროვანი აქტივობები, გარემო საკვანძო კომპეტენციების განვითარებისათვის.
ახალგაზრდებს მიეცემათ შესაძლებლობა საკუთარი იდეების რეალიზებისათვის.
სტაჟირების პერიოდი - 3 თვე .

სტაჟირების დასრულების შემდეგ ახალგაზრდა მიიღებს სტაჟირების დამადასტურებელ სერტიფიკატს.

* "ინგლისური ენის ხელმისაწვდომობის პროგრამა " - სტაჟირება დაეხმარება ახალგაზრდას აიმაღლოს ინგლისური ენის ცოდნის დონე, განრიგი - კვირის სამუშაო დღეები, 15-18 საათი. მოვალეობა - ინგლისური ენის პედაგოგის დახმარება სასწავლო რესურსების მომზადებასა და სასწავლო გარემოს შექმნაში, მეცადინეობებისას ფოტოების გადაღება, პროგრამის შესახებ ინფორმაციის გავრცელება სოც. მედიაში;
* სიქას საკვირაო კლუბები - სტაჟირება ხელს შეუწყობს ახალგაზრდის კომუნიკაციის, ლიდერობის, დაგეგმვისა და მართვის უნარების გაუმჯობესებას, ახალგაზრდა განივითარებს ტრენერის უნარებს. სამუშაო დღე- კვირა. მოვალეობა - კლუბის ტრენერის დახმარება სასწავლო რესურსების მომზადებასა და სატრენინგო გარემოს მოწყობაში; კლუბის მონაწილეებთან ონლაინ კომუნიკაცია კვირის განმავლობაში, საკლუბო შეხვედრებისას ფოტოებისა და ვიდეოების გადაღება, კლუბის ფეისბუკ-გვერდის მართვა;
სტაჟირების მსურველმა უნდა შეავსოს აპლიკაცია.
დამატებითი კითხვებისათვის მოგვმართეთ:
ტელ. 599 433848
ქ. რუსთავი, მეგობრობის გამზ, 12-56.

Monday, October 9, 2017

სიქა-ს მომავალ ლიდერთა კლუბი დაიწყო

8 ოქტომბერს სიქა-ს ოფისში შედგა 9-12 წლის ასაკის ჯგუფის პირველი შეხვედრა. კლუბმა აქტიურად დაიწყო მუშაობა. პირველი დღე ყინულის დნობისა და გაცნობით სავარჯიშოებს დაეთმო. 
კლუბში გაწევრიანების მსურველებს შეუძლიათ შემოგვიერთდნენ 15 ოქტომბერს 13:30 სთ-ზე. კლუბში რეგისტრაცია გაგრძელებულია 27 ოქტომბრამდე. რეგისტრაციისთვის მიყევით ბმულს:  http://webanketa.com/forms/68s36dsn6cqkjcb671gp6rk5/

ასევე გრძელდება მსურველთა მიღება 13-17 წლის ასაკის ჯგუფში, რომლის პირველი შეხვედრა შედგება ჯგუფის დაკომპლექტებისთანავე. იხილეთ რეგისტრაციის ბმული

Saturday, October 7, 2017

სიქას დელეგაცია მონაწილეობს საერთაშორისო ტრენინგ-კურსში "Action2Learn"

სიქა-ს დელეგაცია მარიამ გელდიაშვილის, კესო პაპავას და თიკო ხეცურიანის შემადგენლობით მონაწილეობას იღებს საერთაშორისო ტრენინგ კურსში "Action2Learn". ტრენინგი ტარდება პროგრამის Erasmus Plus ფარგლებში. ტრენინგის მთავარი თემაა ახალგაზრდული ჩართულობისა და მოხალისეობის ხელშეწყობა. ორგანიზატორი - დანიური ორგანიზაცია '"Inter College", მოლდავეთში გამართულ ტრენინგში მონაწილეობას იღებს ათი ქვეყნის წარმომადგენელი 30 ახალგაზრდული მუშაკი.

Monday, September 25, 2017

სიქას წარმომადგენლებმა მონაწილეობა მიიღეს საერთაშორისო კონფერენციაშია პოლიტიკური განათლების თემაზე

21 სექტემბერს სიქას წარმომადგენლებმა ინგა პაიჭაძემ და ცირა თავშავაძემ მონაწილეობა მიიღეს საერთაშორისო კონფერენციაშია პოლიტიკური განათლების თემაზე. კონფერენცია, გაიმართა გერმანიაში, ქ. ბერლინში, ისაუბრეს პროგრამა U18-ის ორგანიზების გამოცდილებაზე გერმანიაში, საქართველოში, უკრაინასა და რუსეთში. პანელურ დისკუსიაზე განიხილეს U18-ის ქართულ ვერსიაზეც, რომელიც საინტერესო და ინოვაციური მიდგომაა პროგრამის იმპლემენტაციის კუთხით.

Thursday, September 21, 2017

სიქას დახმარებით კიდევ ერთი ქართველი ახალგაზრდა შეუერთდა EVS მოხალისეობრივ პროექტს

კიდევ ერთი ქართველი ახალგაზრდა - თამუნა აღნიაშვილი სიქას დახმარებით შეუერთდა EVS მოხალისეობრივ პროექტს ქ. დრაგაშანში, რუმინეთი. თამუნა სხვა ევროპელ მოხალისეებთან ერთად ადგილობრივი ახალგაზრდებისათვის დაგეგმავს და განახორციელებს ახალგაზრდულ არაფორმალურ აქტივობებს, რომელთა მიზანი ეთნიკური უმცირესობების ინტეგრაცია და სამოქალაქო ცნობიერების ამაღლებაა. პროექტში მონაწილეობის შედეგად თამუნა განივითარებს უცხო ენებზე კომუნიკაციის, ინტერკულტურულ, სამოქალაქო და სხვა საკვანძო კომპეტენეციებს.

Tuesday, September 12, 2017

Step Forward - პრაქტიკული ინგლისურის კურსი სიქა-ში სპეციალურ ფასად რუსთაველებისთვის

Step Forward - პრაქტიკული ინგლისურის კურსი მათთვის, ვისაც საერთაშორისო პროგრამებში მონაწილეობა სურთ.
კურსს რუთავში ადმინისტრირებას უწევს სიქა.  სწავლა მთლიანად დამყარებული იქნება პრაქტიკულ მეცადინეობაზე, რაც გულისხმობს არაფორმალური მეთოდებით სწავლას “Learning by doing”. შემუშავებულია EMT განათლებისა და მართვის გუნდში  და ეფუძნება CISV და Erasmus+ აქტივობებს. კურსს წარუძღვებიან ქართველი ლიდერები, რომლებსაც არაერთ საერთაშორისო პროექტში აქვთ მიღებული მონაწილეობა. პერიოდულად გვეყოლება უცხოელი მოწვეული სტუმრები.
თითოეული მეცადინეობა დაეთმობა კონკრეტულ თემას ან სიტუაციას, რომლის ფარგლებშიც გვექნება სიმულაციები, როლური თამაშები, დისკუსიები და სხვა. რა თქმა უნდა ყველაფერი ინგლისურ ენაზე. საწყის ეტაპზე შესაძლებელი იქნება „თარგმნის შესვენებების“ გამოყენება.
კურსის ხანგრძლივობა: 3 თვე, სურვილის შემთხვევაში ჯგუფთან მუშაობა გაგრძელდება 2018 წლის ზაფხულამდე.
ასაკობრივი ჯგუფი: 10-13 წელი
ჩატარების დრო: კვირა, 10:00-13:00 სთ.
კურსის ღირებულება რუსთავში: 49 ლარი თვეში.
გაიცემა სერტიფიკატი
რეგისტრაციისთვის მიყევით ბმულს: http://webanketa.com/forms/68s36dsn60qkcdk56rv6ce9k/
რეგისტრაცია გაგრძელდება 13 ოქტომბრამდე. რეგისტრაციის ვადის დასრულების შემდეგ, თითოეულ აპლიკანტს მითითებულ ნომერზე დაუკავშირდება სიქა-ს წარმომადგენელი.
კურსი დაიწყება 15 ოქტომბრიდან.

Monday, September 11, 2017

მომავალ ლიდერთა ტრენინგ-კურსი სიქა-ში სპეციალურ ფასად რუსთაველებისთვის

სიქა  EMT-სთან თანამშრომლობით გთავაზობთ „მომავალ ლიდერთა ტრენინგ-კურსს“, რომლის მიზანია მოზარდებმა ადრეული ასაკიდან დაიწყონ ტოპ-მენეჯერის/ლიდერის უნარების შეძენა.  არაფორმალური განათლების მეთოდებით მონაწილეები საკუთარ თავზე გამოცდიან სხვადასხვა გამოწვევებს/სიტუაციებს და თვითონ გამოაქვთ დასკვნები. ტრენინგ-კურსი ხელს უწყობს მოზარდის მიმღებლობის გაზრდას და ურთიერთობის გაუმჯობესებას თანატოლებთან. კურსი წლებია მიმდინარეობს თბილისში EMT  განათლებისა და მართვის გუნდში და ახლა უკვე რუსთავშიცაა ხელმისაწვდომი სპეციალურ ფასად.
მომავალ ლიდერთა ტრენინგ-კურსი მოიცავს 12 შეხვედრას, შემდეგი თემებით:
1.       გაცნობა-ჯგუფური შეთანხმება;
2.       ყინულის დნობა, ჯგუფის შეკვრა;
3.       ტოლერანტობა/პატივისცემა;
4.       ეფექტური კომუნიკაცია;
5.       გუნდურობა;
6.       ლიდერობა;
7.       სტერეოტიპები;
8.       კულტურული მრავალფეროვნება;
9.       შემოქმედებითობა;
10.   პასუხისმგებლობა;
11.   პრეზენტაციის უნარები;
12.   ლოგიკური აზროვნება/დაკვირვება
კურსის დახურვა.

 თითოეული ტრენინგის ხანგრძლივობაა 2 საათი.
ტრენინგ-კურსზე დარეგისტრირება შეუძლიათ მოსწავლეებს შემდეგ 2 ასაკობრივ კატეოგორიაში:
·         9-დან 12- წლამდე,  კვირას, 13:30 -15:30 სთ.
·         13დან 17 -წლამდე, კვირას,   16:00 - 18:00 სთ.
ტრენინგ-კურსის დასრულების შემდეგ გაიცემა სერტიფიკატი.
კურსის ღირებულება რუსთავში: 39 ლარი თვეში
რეგისტრაციისთვის მიყევით ბმულს: http://webanketa.com/forms/68s36dsn6cqkjcb671gp6rk5/
რეგისტრაცია გაგრძელდება 6 ოქტომბრამდე. რეგისტრაციის ვადის დასრულების შემდეგ, თითოეულ აპლიკანტს მითითებულ ნომერზე დაუკავშირდება სიქა-ს წარმომადგენელი.
კურსი დაიწყება 8 ოქტომბრიდან.

Monday, September 4, 2017

U18 პროგრამის ფარგლებში თბილისში სამუშაო შეხვედრა ჩატარდა

3-4 სექტემბერს სიქამ ორგანიზება გაუკეთა სამუშაო შეხვედრას თბილისში U18 პროგრამის ფარგლებში. პროექტი "მეტი შეგიძლია - ბავშვებისა და ახალგაზრდების სამოქალაქო მონაწილეობის გაძლიერებისათვის აღმოსავლეთ ევროპაში" - ახალი პროექტია, რომელსაც საქართველოში სიქა წარმოადგენს. პროექტში ჩართულია საქართველოს 10 რეგიონი. თბილისში ჩატარებულ სამუშაო შეხვედრას დაესწრო სამოქალაქო განათლების პედაგოგები თბილისის, ქვემო ქართლის, კახეთის, შიდა ქართლისა და მცხეთა-თიანეთის საჯარო სკოლებიდან, გერმანელმა ექსპერტმა ნორა კორტემ მონაწილეებს გააცნო პროგრამა U18 მიზნები, ისტორია და განხორციელების მეთოდები. პედაგოგებმა იმსჯელეს U18 მეთოდით იმიტირებული ახალგაზრდული არჩევნების საქართველოში ჩატარების შესაძლებლობებზე, წარმოადგინეს კონკრეტული გეგმები საპროექტო აქტივობების ორგანიზებისათვის.

Friday, August 11, 2017

მიმდინარეობს ბანაკი "ინიციატორი 2017"

7 აგვისტოს ბაკურიანში სიქას კიდევ ერთი ბანაკი "ინიციატორი 2017" დაიწყო. ბანაკში მონაწილეობას იღებს 23 უფროსკლასელი მოსწავლე ქ. რუსთავის #10 და #28 სკოლებიდან. ბანაკის განმავლობაში მოსწავლეებს ჩაუტარდებათ ტრენინგები მეწარმეობისა და სოციალური პროექტების შექნისა და მართვის თემებზე. დღის მეორე ნახევარი დატვირთულია მრავალფეროვანი საბანაკე აქტივობებით. პროექტის განმახორციელებელი პარტნიორია "კონსულტაციისა და ტრენინგის ცენტრი".

Tuesday, August 1, 2017

ტრენინგ-კურსი "ANOTHER WORLD IS POSSIBLE"

photo of Liviu Rotaru
25.07-03.08/2017 სიქა-ს წარმომადგენლები  მონაწილეობას იღებენ ERASMUS+  პროგრამის ტრენინგ-კურსში "Another world is possible", რომლის მიზანია ურბანული კულტურის გააზრება და კონფლიქტების მოგვარების ინსტრუმენტების გაცნობა. ტრენინგ-კურსი ტარდება დიდ ბრიტანეთში, ქ.ვირკსვორტში "Inter college"-ის ორგანიზებით და "Baby people"-თან თანამშრომლობით. 
ტრენინგ-კურსში საქართველოს გარდა მონაწილეობას იღებენ დიდი ბრიტანეთის, დანიის, პორტუგალიის, რუმინეთის, უკრაინის, მოლდოვეთისა და სომხეთის ახალგაზრული ორგანიზაციების წარმომადგენლები.

Monday, June 19, 2017

სამოქალაქო განათლების საზაფხულო ბანაკი 2017

2017 წლის 18-22 ივნისს სიქას ორგანიზებით დაბა ბაკურიანში მიმდინარეობს სამოქალაქო განათლების საზაფხულო ბანაკი 2017. 
ბანაკი ეწყობა სამოქალაქო განათლების პროგრამის "მომავლის თაობა" ფარგლებში. ბანაკში მონაწილეობას იღებენ 80 მოსწავლე და 11 სამოქალაქო განათლების პედაგოგი საქართველოს 11 რეგიონიდან. ფოტო

პროგრამის "მომავლის თაობა" შემაჯამებელი ღონისძიება მარნეულში


16 ივნისს სიქა-ს ორგანიზებით მარნეულის მუნიციპალიტეტის გამგეობის სააქტო დარბაზში გაიმართა სამოქალაქო განათლების პროგრამის "მომავლის თაობა" შემაჯამებელი ღონისძიება. ღონისძიების ფარგლებში პროგრამის დირექტორმა ქვემო ქართლში წარმოადგინა, პროგრამის მიმდინარეობის სამი წლის განმავლობაში, მიღწეული შედეგები. სამიზნე სკოლის აქტიურმა მოსწავლეებმა აუდიტორიას მათ მიერ განხორციელებული სამოქალაქო აქტივობები გააცნეს. შეხვედრის ბოლოს მოეწყო სხვადასხვა ნომინაციაში გამარჯვებული სკოლების, მოსწავლეებისა და მასწავლებლების დაჯილდოება.
ღონისძიებას ესწრებოდნენ პროგრამის სამიზნე სკოლების დირექტორები, მასწავლებლები და მოსწავლეები, მარნეულის სამთავრობო და არასამთავრობო ორგანიზაციების წარმომადგენლები, სახალხო დამცველის ქვემო ქართლის რეგიონის წარმომადგენლისა და პროგრამის ხელმძღვანელები. ფოტო
პროგრამის „მომავლის თაობა“ მიზანია, სკოლებში სამოქალაქო განათლების სასწავლო პროგრამის გაუმჯობესების გზით, სამოქალაქო საზოგადოების ცნობიერების ამაღლება და სამოქალაქო გააქტიურება.
პროგრამა საქართველოს 11 რეგიონის 480 სკოლაში ხორცილედება.

Monday, June 5, 2017

სიქა-ს გერმანელი მოხალისეების თანამშრომლობა რუსთავის #1 საჯარო სკოლასთან

სიქას გერმანელი მოხალისეები კატალინა ვორტმანი და ანიკა გიუნტერი მიმდინარე სასწავლო წელს აქტიურად თანამშრომლობენ რუსთავის #1 საჯარო სკოლასთან: მე-10 კლასელ მოსწავლეებს ეხმარებიან გერმანული ენის უკეთ შესწავლაში. 1 ივნისს რუსთავის #1 საჯარო სკოლის მე-10 კლასში ჩატარდა ღია გაკვეთილი გერმანულ ენაში, გერმანული ენის პედაგოგთან თანამშრომლობით სიქას ევროპელმა მოხალისეებმა ფასილიტაცია გაწიეს ჯგუფებში სხვადასხვა დავალებების შესრულების დროს.

Thursday, May 25, 2017

სიქას ახალი კლუბი ბავშვებისთვის "პატარა შემოქმედები"

ძვირფასო მშობლებო!!!
გსურთ თქვენმა პატარებმა :
• განივითარონ შემოქმედებითობა და საკუთარი ხელით შექმნან საინტერესო და სასარგებლო ნივთები?
• გაიუმჯობესონ ინგლისურ ენაზე კომუნიკაციის უნარი სიქას ევროპელ მოხალისეებთან ურთიერთობით?
• მიიღონ არაფორმალური განათლების გამოცდილება?
სიქას კლუბი „პატარა შემოქმედები“ იწვევს 6-11 წლის ბავშვებს ერთ თვიან კლუბში, 29 მაისიდან ყოველ ორშაბათს 17:30-ზე. კლუბში მუშაობას გაუძღვებიან სიქას გერმანელი მოხალისეები კატალინა და ანიკა. კლუბში გაწევრიანება უფასოა მონაწილეთათვის.
ჯგუფის წევრთა შეზღუდული რაოდენობის გამო სასურველია წინასწარ ჩაწერა:
მისამართი: ქ. რუსთავი, მეგობრობის გამზ. 12-56.
ტელ: 0341 223133;

სამუშაო შეხვედრა პარტნიორ ორგანიზაციებთან პროექტის „მეტი შეგვიძლია! - ბავშვებისა და ახალგაზრდების სამოქალაქო მონაწილეობის გაძლიერების ხელშეწყობა აღმოსავლეთ ევროპაში“ ფარგლებში


22-23 მაისს სიქამ უმასპინძლა პარტნიორი ორგანიზაციების წარმომადგენლებს გერმანიიდან, უკრაინიდან და რუსეთიდან. შეხვედრა შედგა პროექტის ფარგლებში «Mehrbewegen! – Füreinestarke Kinder – und Jugendbeteiligungin Osteuropa» - „მეტი შეგვიძლია! - ბავშვებისა და ახალგაზრდების სამოქალაქო მონაწილეობის გაძლიერების ხელშეწყობა აღმოსავლეთ ევროპაში“.

სამოქალაქო განათლების ექსპერტთა საერთაშორისო ჯგუფმა ერთობლივად იმუშავა სამოქალაქო და პოლიტიკური განათლების საერთაშორისო პრაქტიკული გზამკვლევის შექმნაზე. სიქა-ს აღმასრულებელი დირექტორი ინგა პაიჭაძე და გერმანული ორგანიზაცია DRA-ს წარმომადგენელი ირინა ბუხარკინა შეხვდნენ საქართველოში გერმანიის საელჩოს, საქართველოს განათლებისა და მეცნიერების სამინისტროსა და საერთაშორისო ორგანიზაციების წარმომადგენლებს, გააცნეს მათ პროექტის მიზნები, დაისახა პროექტის ფარგლებში თანამშრომლობის შესაძლებლობა.

Wednesday, May 24, 2017

გარემოსდაცვითი კედლის ნახატის შექმნა სოფლის ცენტრში სასაზღვრო მაგისტრალზე

პროგრამის "მომავლის თაობა" ფარგლებში სიქას მიერ ორგანიზებულ ახალგაზრდულ ფორუმზე მარნეულის მუნიციპალიტეტის სოფელ კაჩაგანის და კირაჩ-მუღანლოს საჯარო სკოლების მოსწავლეებმა შეიმუშავეს და განახორციელეს გარემოსდაცვით პროექტი "დავიცვათ ჩვენი დედა-ბუნება". პროექტის საბოლოო აქტივობა გახლდათ მოსწავლეთა გარემოსდაცვითი ნახატების კონკურსის ერთ-ერთი ნამუშევრის მიხედვით სოფელ კაჩაგანის ცენტრში კედლის მოხატვა. კაჩაგანის #1 სკოლამ ითანამშრომლა სოფელში მოქმედ მცირე ბიზნესთან, რომელმაც ახალგაზრდებს კედლის ნახატის შესასრულებლად კედელი გამოუყო სოფლის ცენტრში, სასაზღვრო ტრასაზე. პროფესიონალი მხატვრის დახმარებით ახალგაზრდებმა კედელზე გადაიტანეს კაჩაგანის #1 საჯარო სკოლის მოსწავლის ნახატი გარემოსდაცვითი მოწოდებებით ქართულ და აზერბაიჯანულ ენებზე. კედლის ნახატი და მოწოდებები ხელს შეუწყობს თემის გარემოსდაცვითი ცნობიერების ამაღლებას.

Thursday, May 18, 2017

ახალგაზრდული ფორუმის შემაჯამებელი ღონისძიება ბოლნისში

11 მაისს ბოლნისის მუნიციპალიტეტის გამგეობის სააქტო დარბაზში სიქა-ს მიერ ორგანიზებული იქნა ახალგაზრდული ფორუმის შემაჯამებელი ღონისძიება. ღონისძიებაზე წარმოდგენილი იყო პროგრამაში "მომავლის თაობა" ჩართული 19 სკოლის მიერ განხორციელებული 5 ახალგაზრდული პროექტი. ახალგაზრდებმა მათ მიერ ინიცირებული პროექტების განხორციელებით თავიანთი წვლილი შეიტანეს რუსთავში, გარდაბნის, ბოლნისის, დმანისისა და თეთრიწყაროს მუნიციპალიტეტების სოფლებში ისეთი პრობლემების მოგვარებაში, როგორიცაა: გარემოს დაბინძურება, კომფორტულად მგზავრობა, სხვადასხვა ეთნიკური ჯგუფების ინტეგრაცია, ჯანსაღი ცხოვრების პოპულარიზაცია და სხვა. ღონისძიებას ესწრებოდნენ მუნიციპალიტეტების თვითმმართველობების წარმომადგენლები, რომლებიც დაეხმარნენ მოსწავლეებს პროექტების განხორციელებაში.

ბავშვებსა და ახალგაზრდებში სამოქალაქო მონაწილეობის გაძლიერების ხელშეწყობის საუკეთესო პრაქტიკის გაზიარება - კონკურსი „მეტი შეგვიძლია!“

სიქა-საგანმანათლებლო ინიციატივების ქართული ასოციაცია გიწვევთ სასწავლო დაწესებულებებს, სამთავრობო და არასამთავრობო ორგანიზაციებს, ყველა დაინტერესებულ პირს გაზიარება-კონკუსში მონაწილეობის მისაღებად, რომელიც გამოავლენს ბავშვებსა და ახალგაზრდებში სამოქალაქო განათლების, პოლიტიკური განათლების, დემოკრატიული კულტურის აღზრდის საუკეთესო მეთოდურ მიდგომებს.
საუკეთესო პრაქტიკის გაზიარება-კონკურსის მიზანია ქართული გამოცდილების შესახებ ინფორმაციის შეკრება და გამოქვეყნება საერთაშორისო პრაქტიკულ სახელმძღვანელოში, რომელიც იქმნება საერთაშორისო პროექტის ფარგლებში: «Mehrbewegen! – Füreinestarke Kinder – und Jugendbeteiligungin Osteuropa» - „მეტი შეგვიძლია! - ბავშვებისა და ახალგაზრდების სამოქალაქო მონაწილეობის გაძლიერების ხელშეწყობა აღმოსავლეთ ევროპაში“. ასევე დაგეგმილია ბავშვებისა და ახალგაზრდების სამოქალაქო მონაწილეობის წარმატებული საგანმანათლებლო პრაქტიკის ეროვნული ონლაინ კატალოგის შექმნა, რომელიც განთავსდება ელექტრონულ ბიბლიოთეკაში პროექტის საიტზე: http://u18georgia.blogspot.com/
საუკეთესო პრაქტიკის ავტორები გამოცდილების გასაზიარებლად მიწვეულნი იქნებიან ბავშვთა და ახალგაზრდობის სამოქალაქო მონაწილეობის საერთაშორისო კონფერენციაზე და II ახალგაზრდულ ფორუმზე „U 18 - მეტი შეგვიძლია“ კიევში, 2017 წ. ოქტომბერში.

Friday, May 5, 2017

პროექტის "საქართველო ჩემი სამშობლოა" შემაჯამებელი ღონისძიება


26 აპრილს, სიქას ორგანიზებით მარნეულის მუნიციპალიტეტის გამგეობის შენობის სააქტო დარბაზში გაიმართა პროექტის "საქართველო ჩემი სამშობლოა" შემაჯამებელი ღონისძიება. პროექტი განხორციელდა მარნეულის მუნიციპალიტეტის სოფლების: თაქალოს, ყულარის, არაფლოს და შაუმიანის # 2 საჯარო სკოლების სამოქალაქო კლუბების მიერ, პროგრამის "მომავლის თაობა" ფარგლებში. 
პროექტის მიზანი იყო მასში ჩართული სკოლების ქართველი, აზერბაიჯანელი და სომეხი ეთნოსის მოსწავლეების დაახლოება, ერთმანეთის კულტურის გაცნობა და ინტეგრაცია. გამგეობის სააქტო დარბაზში გამართულ შეხვედრაზე თითოეულმა სკოლამ წარადგინა კულტურული პროგრამა. მოსწავლეებმა წაიკითხეს ქართული, აზერბაიჯანული და სომხური ლექსები, იმღერეს სამივე ეთნოსისთვის დამახასიათებელი სიმღერები, მოირგეს ტრადიციული ტანისამოსი და შეასრულეს ხალხური ცეკვები. 

ახალგაზრდული ფორუმის 2 პროექტის შემაჯამებელი ღონისძიება მარნეულში


21 აპრილს სიქას ორგანიზებით მარნეულის დემოკრატიული ჩართულობის ცენტრში პროგრამის "მომავლის თაობა" ფარგლებში განხორციელებული ორი პროექტის: "დავიცვათ ჩვენი დედა-ბუნება" და "ვიზრუნოთ ჩვენს ჯანმრთელობაზე" შემაჯამებელი ღონისძიება გაიმართა.
პროექტები პროგრამის ფარგლებში გამართულ მოსწავლეთა ახალგაზრდულ ფორუმზე მონაწილე სამოქალაქო კლუბების წევრების მიერ შეიქმნა. 
"დავიცვათ ჩვენი დედა-ბუნება" გარემოსდაცვითი პროექტია, რომელიც კაჩაგანის #1, კაჩაგანის #2 და კირაჩმუღანლოს საჯარო სკოლების სამოქალაქო კლუბის წევრების მიერ განხორციელდა, პროექტის:"ვიზრუნოთ ჩვენს ჯანმრთელობაზე" მიზანი კი ცხოვრების ჯანსაღი წესის პოპულარიზაცია იყო. პროექტში ქვემო სარალის, ზემო სარალის, დამიაგეორარხისა და ჯავშანიანის სკოლების სამოქალაქო კლუბების წევრების მონაწილეობდნენ. 

Tuesday, April 18, 2017

"ხელნაკეთი ნივთების კლუბის" ახალი ნაკადი იწყება

სიქა-ში იწყება "ხელნაკეთი ნივთების კლუბის" ახალი ნაკადი განახლებული დროით. 
მობრძანდით ყოველ სამშაბათს, 17:30 სთ-ზე და შესძინეთ ახალი სიცოცხლე დაძველებულ ნივთებს. 
კლუბში მონაწილეობა უფასოა და განკუთვნილია დაწყებითი კლასების მოსწავლეებისთვის.
გელით!
მისამართი: ქ.რუსთავი, მეგობრობის გამზირი, #12-56

მოსწავლეების შეხვედრა სახალხო დამცველის აპარატის წარმომადგენლებთან


სიქას ორგანიზებით 11-12 აპრილს მარნეულის მუნიციპალიტეტის სოფ. ილმაზლოსა და ქესალოს საჯარო სკოლებში გაიმართა აზერბაიჯანელი მოსწავლეებისა და მასწავლებლების შეხვედრა სახალხო დამცველის აპარატის წარმომადგენლებთან. შეხვედრებს ილმაზლოს, ქესალოსა და ქეშალოს სკოლების 50 მოსწავლე და მასწავლებელი დაესწრო. მოწვეული სტუმრები იყვნენ საქართველოს სახალხო დამცველის აპარატის გენდერული თანასწორობის დეპარტამენტის წარმომადგენელი - სოფო რუსეცკი და სახალხო დამცველის ქვემო ქართლის ოფისის წარმომადგენლები - მურად ჰუსეინოვი და მარი გვიდიანი.


Sunday, March 26, 2017

მოსწავლეების შეხვედრა უბნის ინსპექტორებთან ადრეული ქორწინებისა და ოჯახური ძალადობის თემაზე


24 მარტს მარნეულის დემოკრატიული ჩართულობის ცენტრში სიქას ორგანიზებით, პროგრამის "მომავლის თაობა" ფარგლებში საინტერესო შეხვედრა გაიმართა. მოწვეული სტუმრები: ქვემო ქართლის პოლიციის დეპარტამენტის უბნის ინსპექტორი მაია ფელიშვილი და ამავე დეპარტამენტის გარდაბნის რაიონული სამმართველოს უბნის ინსპექტორი ნურლანა ახმედოვა, მარნეულის მუნიციპალიტეტის სოფლების - კირაჩმუღანლოს, ყულარის, ქვემო სარალისა, თაქალოს საჯარო სკოლების მოსწავლეებსა და მასწავლებლებს შეხვდნენ. სტუმრებმა ისაუბრეს ადრეული ქორწინებისა და ოჯახში ძაალადობის საკითხებზე. ქალბატონმა მაიამ ახალგაზრდებს დაწვრილებით განუმარტა ის საკანონმდებლო რეგულაციები, რაც ადრეულ ქორწინებასთან დაკავშირებით არსებობს ქართულ კანონმდებლობაში. დეტალურად ისაუბრა სისხლის სამართლის კოდექსში შესულ ცვლილებასა და 150 პრიმა მუხლზე, რომელიც ქორწინების იძულებას შეეხება. მოსწავლეებს განემარტათ თუ რას ნიშნავს ქორწინების იძულება და როგორ უნდა დაიცვან თავი ამგვარი იძულებისაგან. მასწავლებლებს განემარტათ ის დადგენილება, რომლის თანახმადაც მათ ეკისრებათ შეტყობინების ვალდებულება, თუკი მათთვის ცნობილი გახდება ქორწინების იძულების ფაქტის შესახებ. გარდა ამისა, სტუმრებმა დეტალურად ისაუბრეს იმ პრობლემებზე, რასაც ზოგადად იწვევს ადრეული ქორწინება. 

შეხვედრა წარმატებულ სპორტსმენთან


სიქა-ს ორგანიზებით,16 მარტს პროგრამის "მომავლის თაობა" ფარგლებში მარნეულის დემოკრატიული ჩართულობის ცენტრში გაიმართა შეხვედრა აზერბაიჯანელ ძიუდოისტთან, საქართველოს ჩემპიონთან და საერთაშორისო ტურნირების წარმატებულ მონაწილესთან - სამათ ალიევთან და მარნეულის სპორტული სკოლის წარმომადგენელთან - დავით ნაზღაიძესთან.

შეხვედრას დაესწრნენ პროექტის - "ვიზრუნოთ ჩვენს ჯანმრთელობაზე" ავტორები და სხვა მოსწავლეები ქვემო სარალის, ზემო სარალის, შაუმიანისა და ჯავშანიანის საჯარო სკოლებიდან. სამათმა აზერბაიჯანულ ენაზე ისაუბრა წარმატების მისაღწევად მის მიერ განვლილ გზაზე, სპორტის ადგილზე მის ცხოვრებაში, ჯანსაღი ცხოვრების წესის მნიშვნელობაზე და მის სამომავლო გეგმებზე. 

Monday, March 13, 2017

მონაწილეობა ახალგაზრდულ გაცვლით პროექტში "Say It out loud"

3-12 მარტს რუმინეთის ქალაქ ბუსტენში პროგრამა "Erasmus plus" ფარგლებში მოეწყო ახალგაზრდული გაცვლითი პროექტი "Say It out loud", რომელშიც მონაწილეობდა სიქას მიერ გაგზავნილი ქართული დელეგაცია. ქართველი, რუმინელი, პოლონელი და პორტუგალიელი ახალგაზრდები პროექტის განმავლობაში სწავლობდნენ საჯარო გამოსვლის ტექნიკას და ივითარებდნენ საჯარო გამოსვლის უნარებს. 

Thursday, March 9, 2017

ქართველი მოხალისეები მონაწილეობენ Erasmus+ პროექტში "Silesian institutions service quality relative to foreigners"

სიქამ კიდევ ორ ქართველ ახალგაზრდას მალხაზ ჯიღაურაშვილს და გიორგი თურქაძეს მისცა შესაძლებლობა მონაწილეობა მიიღონ ევროპულ მოხალისეობრივ პროექტში "Silesian institutions service quality relative to foreigners". ქართველი ახალგაზრდები იტალიელ და ესპანელ ახალგაზრდებთან ერთად 12 თვის განმავლობაში მოხალისეობრივად იმუშავებენ პოლონეთის ქალაქ კატოვიცეში, დაეხმარებიან მასპინძელ ორგანიზაციას Bona Fides მიმდინარე პროექტების განხორციელებაში.

Wednesday, March 1, 2017

ფორუმის მონაწილეების ვიზიტი მარნეულის მუნიციპალიტეტის გამგეობაში


28 თებერვალს სიქას ორგანიზებით პროგრამის "მომავლის თაობა" ფარგლებში მარნეულის მუნიციპალიტეტის სოფლების: კაჩაგანის, თაქალოს, არაფლოსა და ყულარის საჯარო სკოლების სამოქალაქო კლუბის წევრები სამოქალაქო განათლების მასწავლებლებთან ერთად მარნეულის მუნიციპალიტეტის გამგეობას ეწვივნენ. მოსწავლეები შეხვდნენ განათლების, კულტურის, სპორტისა და ახალგაზრდულ საქმეთა განყოფილების სპეციალისტებს: მარიამ ტყეშელაშვილს, ირმა ჩხეტიანს, ნინო კირვალიძესა და მარნეულის კულტურის ცენტრის წარმომადგენელს - ირაკლი ნოზაძეს. 
ახალგაზრდებმა გამგეობის წარმომადგელნებს გააცნეს მოსწავლეთა ახალგაზრდული ფორუმის ფარგლებში მათ მიერ დაწერილი პროექტები და კონკრეტული აქტივობების განხორციელებაში გამგეობას მხარდაჭერა სთხოვეს. შეხვედრა საკმაოდ ნაყოფიერი
გამოდგა. გამგეობის წევრებმა მოიწონეს მოსწავლეების გეგმები და მათ საპროექტო იდეების გახორციელებაში აქტიურ მხარდაჭერას დაპირდნენ. კერძოდ, გამგეობა აქტიურად ითანამშრომლებს კაჩაგანის # 1, # 2 და კირაჩმუღანლოს სკოლებთან, რომლებიც გარემოს დაცვით პროექტს ახორციელებენ და ასევე თაქალოს, ყულარის, არაფლოსა და შაუმიანის სკოლებთან, რომლებიც ინტეგრაციის ხელშემწყობ პროექტზე მუშაობენ.
პროგრამას "მომავლის თაობა" ახორციელებს ორგანიზაცია PH International აშშ საერთაშორისო განვითარების სააგენტოს (USAID) დაფინანსებით. პროგრამას მხარს უჭერს საქართველოს განათლებისა და მეცნიერების სამინისტროს მხარდაჭერით. სიქა წარმოადგენს პროგარმის პარტნიორს ქვემო ქართლის რეგიონში.